DAVAO CITY – Moabot na sa 176 ang kinatibuk-ang ihap sa mga tulunghaan sa dakbayan sa dabaw ang mibalik sa ilang face to face classes karong panahona.
Kini ang gibutyag ni Jenielito Dodong Atillo, ang tigpamaba sa department of education (DepEd) 11 atol sa pakighinabi sa Bombo Radyo.
Sumala pa ni Atillo 135 sa nahisgutang ihap ang mga bag-ong nadugang gikan sa 41 ka mga kanhi na mipatuman ug face to face classes nga mga pampublikong tulunghaan sa dakbayan.
Karong adlawa, mipahigayon ang DepEd 11 officials ug pagbisita sa mga public schools nga mibalik sa ilang in person classes aron makahimo sa pag-assess sa sitwasyon ug matubag ang mga pangutana sa mga ginikanan ug mga magtutudlo batok sa pagbalik na sa klase sa mga kabataan.
Dugang pa ni Atillo nga tumong usab sa ilang pagduaw sa mga tulunghaan nga lantawon kung unsa pa ang angayang palambuon sa pagpahigayon ug face to face classes sa mga tulunghaan.
Gipasalig usab ni Atillo nga gipatuman sa DedpEd ang tukmang mga Health protocols aron masiguro ang kaluwasan sa mga bata samtang naa sulod sa ilang tagsa-tagsa ka mga tulunghaan.
Bisan pa man ug balik na ang face to face classes apan limitado lamang gihapon ang oras sa mga bata sa tulunghaan diin ang mga naa sa kinder duha ka oras lamang ang klase ug ang mga naa sa Garde 1 hangttud grade 6, lakip na high school ang kapin sa upat ka oras lamang ang klase sa matag adlaw.
Dugang pa ni Atillo nga gitugyan na lamang sa DepEd ngadto sa mga tulunghaan ang pag-plastar sa schedule sa mga magtutungha.
Apan aron mapabilin ang physical distancing gitugot lamang ang 12 ka mga bata matag klase sa kinder; Grade 1 – Junior High school – 16 ka estudyante ug 20 lamang usab sa senior high school.
