DAVAO CITY – Mi-usbaw na ug dies porsiento ang gidaghanon sa mga biyahe sa nga bus sa Davao City Overland Terminal (DCOTT) alang sa Semana Santa.
Pinasikad sa record sa DCOTT mokabat ngadto sa 1,200 ka mga unit sa bus ang mobiyahe sugod Hwebes Santo kung itande sa naandan nga 650 ka mga units lamang.
Halos usa ka gatus ka mga units sab ang nahatagan ug special permit sa Land Transportation Franchising and Regulatory Board (LTFRB) Eleven.
Tumong niini nga maseguro sa LTFRB nga dili magkulang ang mga bus bisan pa sa das-ag sa bagang panon sa mga pasahero.
Gipang-inspection sab sa LTFRB ang mga bus units aron nga wala’y mahitabo nga pagkalangan sa mga biyahe.
Kalakip sa gisusi ang mga battery, tubig, ligid, brake system, makina, suga, wiper, fuel, tools, ingon man ang rehistro sa bus una pa man makabiyahe ang bus.
Human makapasa sa inspection butangan dayon ug markings ang bus nga mopakita nga haum alang sa mga biyahe ang usa ka bus.
Sa pikas nga bahin gitataw sab ni DCOTT Manager Aiza Yusof nga bisan sa Hwebes ug Biernes Santo duna gihapo’y biyahe ang mga bus, apan posibling mas taas ang mamahimong interval sa ilang mga biyahe gumikan sa kanihit sa mga pasahero atol sa maong panahon.
Hugtanong seguridad pa gihapon ang ipatuman sa DCOTT atol sa maong panahon.
