DAVAO DEL SUR- Kabsan sa kinabuhi ang usa ka babayeng pasahero, samtang baynte dos usab ang nanga-angol human nabalintong ang minibus sa Prk. 3, Balutakay, Hagonoy, Davao Del Sur, kagahapon sa hapon.
Subay sa imbestigasyon sa mga otoridad, samtang naglawig sa kadalanan ang modernong bus gikan Sta. Maria Davao Occidental padulong Digos City, nidritso kini sa usa ka panimalay tapad sa may chapel gumikan sa kadanlog sa kadalanan nga gama sa aspalto.
Gumikan sa kakusog sa impact, nabalintong ang minibus hinungdan sa pagkaangol sa baynte dos ka mga pasahero, samtang kabsan usab sa kinabuhi ang usa ka 62 anyos nga babayeng pasahero.
Dugang pa nga maayo na lamang walay tawo sa nahisgutang balay kung asa kini nabalintong gumikan anaa kini sa ilang mga trabahoan.
Ning kasamtangan, gipahiluna na ang patayng lawas sa babayeng pasahero, samtang gina-andam na ang kasong paga-atubangon sa driver niini.
