Buot karon nga mahatagan ug kasulbaran ang problema sa patubig sa pipila ka mga munisipalidad dinhi sa Mindanao.
Kini ang tinguha karon sa Mindanao Development Authority (MinDA) Board nga mahatagan ug pagtagad ang kakulangon sa tubig sa kapin dos siyentos ka mga munisipalidad sulod sa kapin kuatro siyentos niini nga gikonsidera nga anaa sa kategorya nga waterless municipalities.
Sumala pa ni MinDa Chairperson, Secretary Leo Tereso A. Magno, nga adunay pakig-alayon na nga ilahang gihimo karon sa ilahang buhatan kabahin sa maong problema nga kini gikinahanglan ang pagtinabangay aron nga mahatagan ug sulosyon ang krisis sa tubig.
Gumikan niini, giaprubahan na ang sugyot nga Mindanao Water Supply Program nga ang tumong mao ang paghatag ug tubig sa mga walay water system nga mga munisipalidad dinhi sa Mindanao.
Sa pagkakaron gikanayon ni Magno nga aduna na’y listahan ang Department of Interior and Local Government (DILG) sa mga munisipalidad nga nga walay maayung supaly sa tubig or kadtong mga lugar nga dili maayu ang patubig padulong sa mga residente ilabi pa sa mga hilit nga mga lugar.
Samtang gikanayon sab ni Assistant Secretary Romeo M. Montenegro, ang deputy executive director sa MinDA, nga niadtong 2019, gisugdan na kini nga programa pinaagi sa pagtumbok sa tinuod nga waterless municipalities.
Gipasabot sa nahisgutan nga ang kategorya sa Department of Interior and Local Government (DILG),sa mga makonsidera nga waterless municipalities mao ang pagtumbok sa LGUs or municipalities nga katunga kon 50% sa ilahang kinatibuk-an nga ihap sa katawhan sa maong lugar ang walay access ngadto sa Level 3 water systems.
Sa listahan sa mga munisipalidad sa tibuok Mindanao, adunay 422 ka mga munisipalidad sa tibuok isla ug 213 niini ang nalakip sa kategorya nga waterless municipalities.
Gitinguha sab niini sa maong programa nga sa sunod nga upat ngadto sa lima ka tuig, 121 sa 213 ka mga munisipalidad ang makaangkon na ug maayung suplay sa tubig nga target niini nga masugdan karong 2025 hangtod 2028.
Mokabat sa P3.9 billion ang gigahin nga pondo niini alang sa katumanan sa maong proyekto.
