DAVAO CITY – Mikabat sa walo ka mga pamilya ang gidala sa evacuation center tungod sa nasintian nga pagdahili sa yuta sa Upper West Marahan, Barangay Marilog Proper District.
Sumala pa kang City Disaster Risk Reduction and Management Office (CDRRMO) head, Alfredo Baloran ang mga apektadong residente ang nadala gilayon sa mas luwas nga lugar ug walay natala nga casualties human ang insidente.
Temporaryo nga gipahimutang ang mga nahisgutan sa GKK San Miguel sa nahisgutan nga barangay.
Sumala pa kang Baloran nga gimandoan gilayon sa ilang buhatan ang Barangay Disaster Risk Reduction Management Center (BDRRMC) nga pabakwiton ang mga apektadong pamilya paingon sa evacuation area sa Upper West Marahan covered court apan gibalhin sila sa BDRRMC paingon sa GKK chapel gumikan kay aduna kini bongbong.
Gikanayong nahitabo ang pagdahili sa yuta gumikan sa nasinatian nga mga pag-ulan hatud sa Tropical Depression Agaton.
Subay sa CDRRMO geohazard risk assessment, ang nahisgutang pagdahili sa yuta ang nakaapekto sa tulo ka mga pinuy-anan nga nahimutang sa unstable slope ug huyang nga yuta.
Ang kasikbit nga panimalay ang giila sab nga landslide-prone area ug adunay namatikdan nga mga liki sa kasikbit sab niini nga istraktura.
Gawas sa maong dapit, nakasinate sab sumala pa ug pagdahili sa yuta ang Sitio Epol, Barangay Baganihan partikular na sa usa ka lane sa Davao – Bukidnon road apan wala matud pay gika-report nga apektado.
Gikanayong ang road clearing gipahigayon sa City Engineer’s Office ingon man sa barangay sa lugar aron nga malikayan ang traffic obstruction.
Gipahimangnoan sab niini ang mga residente sa landslide-prone areas sa Marilog nga magpabilin nga alerto sa higayon nga magpadayon ang weather disturbances.
Gipahimangnoan sab niini ang mga residente sa nahisgutan nga dapit partikular na ang mga residente sa Marilog paingon sa Suawan River ug Davao River nga kinahanglan pabilin nga alerto ilabi na kung musaka ang water level sa river channels.
