DAVAO CITY – Nakatala sumala pa ang dakbayan sa Davao ug kinatibuk-ang 299 ka mga kaso sa dengue atol sa unang quarter niining kasamtangan nga tuig uban ang tulo ka mga namatay.
Kini ang gibutyag sa opisyal sa City Health Office. Sumala pa kang Beth Banzon, head sa CHO-Davao’s Tropical Diseases & Nutrition Division, nga ihap sa kaso atol sa unang tulo ka bulan karung tuiga ang misaka sa 11.56% gikan sa 268 ka kaso nga natala karung tuiga sa susama nga panahon kung itandi sa milabay nga tuig.
Gikanayon niini nga sukad Abril 1 hangtud Abril 19, ang lokal mga kagamhanan ang nakatala ug kinatibuk-ang 71 ka mga dengue cases.
Gikanayong pagsaka sa ihap sa dengue cases ang dyutay nga misaka tungod sa rainy season, pakyas ang mga residente nga limpoyohan ang ilang palibut ug ang pagpundo ug tubig sa mga containers nga dili takluban.
Gipahimangnoan ni Banzon ang publiko nga ang mga lamok mamahimong paspas nga makapangitlog sulod sa upat ngadto na sa lima ka adlaw sa mga stagnant waters o bisan sa mga lata, ligid ug uban pang basura nga mamahimong makapundo tubig gikan sa ulan.
Tungod niini, gi-awhag ni Banzon ang mga Dabawenyos nga dad-on gilayon ang miyembro sa pamilya sa balay tambalanan sa higayon nga makasinate kini ug mga sintima sa infection.
Pipila sa mga sintimas sa dengue ang gilangkuban sa taas nga kalintura nga molungtad ug duruha ngadto na sa pito ka adlaw, joint ug muscle pain ug pagpanakit sa matag, pagkaluya, skin rashes, nose bleeding sa higayon nga moubos na ang kalintura, pagpanakit sa tiyan, pagsuka, dark-colored stools, ug malisdan sa pagginhawa.
Tungod niini, Department of Health (DOH)-Davao, gitambagan niini ang publiko nga mutamud sa “4 o’clock habit” o pagpang-limpiyo sa palibut sanglit kini ang oras diin ang mga Aedes aegypti mosquitoes nga carrier ug dengue viruses ang mugawas ug sagad nga mama-ak.
Nasayran nga usa ka pamilya ang wala gilayon gidala ang iyang kabanay sa balay tambalanan diin ulahi na nga dengue ang sakit niini nga maoy hinungdan sa iyang kamatayon.
Pipila sa mga lugar nga natala ang kaso sa dengue ang gilangkuban sa Barangay Dumoy, Barangay 5-A, Barangay 8-A, Barangay 10-A, Barangay 20-B, Catalunan Grande, Barangay 19-B, Matina Aplaya, Marilog Proper, Barangay Malabog sa Paquibato District, ug Barangay San Antonio sa Agdao District.
