DAVAO CITY – Gipasalig ni Lt. Col Daryl Comia, commander sa Task Force Davao, nga andam na sila sa pagpangalagad sa katawhan alang sa umaabot nga selebrasyon sa Kadayawan Festival ug angay nga dili mabalaka ang mga katawhan gumikan mamahimong luwas ug hapsay ang mga katawhan nga mutambong sa umaabot nga Kadayawan Festival ug gihisgutan sab niini ang mga sumbanan sa pagtambong alang sa luwas ug malipayon nga pagselebrar sama sa dili pagsul-ob og jacket, kinahanglan transparent ang sudlanan og tubig, pagsul-ob og face mask, pag-igmat sa palibot ug gilayong pagpahibalo sa kapulisan kung adunay mga naobserbahan nga mga katingalahan nga mga butang o lihok sa mga tao.
Subay sab niini, walay mga hulga o threat nga nadawat ang kapulisan sa siyudad. Ginalantaw nga dakong tabang ang maong pagpaningkamot gumikan bug-os ang puwersa sa kapulisan gumikan sa panag-uban sa duha ka ahensiya. Pinaagi niini, nahimong dali ug gaan ang nahisgutang trabaho. Dugang pa niini nga mahimong hapsay ang selebrasyon kung ang tanang katawhang dabawenyo ang motuman sa sumbanan sa nahisgutang selebrasyon. Nagpahinumdom sab si Col. Comia sa mga dabawenyo nga ipahibalo kini sa ilang mga kaparyentehan ug mga higala nga manambong sa selebrasyon.
VIA || DANICA BAGUIO
