DAVAO CITY – Anaa sa kapin 185 million pesos nga monetary settlement ang nadag-an sa 2,427 ka mga trabahante dinhi sa Davao Region nga nagpadangat sa ilang mga suliran tali sa ilang mga kumpanya pinaagi sa Single Entry Approach kon SENA sa Department of Labor and Employment.
Subay sa datos sa DOLE 11, naresolba ang anaa sa kapin 97.78% katugbang ang 2,508 ka mga assistance request gikan pa niadtong Enero karong tuiga. Samtang anaa sa mga opisina sa Davao City, Davao del Norte ug Davao de Oro nagagikan ang mga hangyo alang sa assistance nga kasagarang nagtuyok sa mubo nga final pay, pagdawat ug sweldo nga mas ubos sa minimum wage, ug illegal dismissal.
Kahinumdumang usa sa mga naresolbang kaso ang lupon sa mga security guards gikan sa Lupon, Davao Oriental nga nagpasa ug reklamo batok sa ilang employer tungod sa pagbaon ug sayup nga sweldo ug benepisyo.
Ang SENA, usa ka programa sa buhatan nga nagpahigayon ug paspas, dali ug baratong settlement procedure sulod sa usa ka bulan nga pagpangilabot sa buhatan.
Mamahimo nga magpadangat ang mga trabahante sa ilang mga kakulian tali sa ilang recruiter ug opisina pinaagi sa website nga sena.dole.gov.ph.
VIA || Bombo LJF
