DAVAO CITY – Gikumpirma ni Davao City Mayor Sebastian Duterte nga gunit na karon sa Davao City Police Office ang suspek sa nahitabong pagbusikad sa usa ka restobar sa Roman Diaz Street, Barangay Calinan Poblacion, Calinan, Davao City nga nahitabo niadtong adlawng Lunes, Agusto 7, nga nagresulta sa kamatayon sa usa ug pagkaangol sa 3 ka mga biktima.
Sumala sa mayor, personal nga pagdumot ang hinungdan nahitabo nga pagbusikad. Sigon sab sa mayor nga ang gigamit nga pabuto, gama sa black powder kon pulbura nga ginagamit sa mga firecracker.
Dugang pagpaklaro sa mayor nga posibleng mahitabo ang mga pagpamusikad bisan pa man sa paghaduol sa mga dagkong selebrasyon sama sa Kadayawan Festival karong bulan, busa importanteng batunan sa katawhan ang culture of security sa dakbayan.
Wala pa nagbutyag ang mayor og dugang pang mga detalye mahitungod sa nasikop nga suspek. Una nang gikataho sa Calinan PNP nga Love Triangle kon crime of passion ang ginalantaw karon nga motibo sa maong krimen.
Ginalantaw pag-usab sa mga otoridad ang CCTV footage duol sa blast site.
Samtang subay sa beripikasyon ni DCPO Director, Police Colonel Alberto Lupaz, gikustodiya sa Bunawan PNP ang usa sa mga suspek nga nagbutang og bomba.
via || Bombo LJF
