DAVAO CITY – Halos nakahikling na ang tanan mga residente nga nanimuyo sa tiilan sa Mt. Apo human nga gideklarang delikado na ang nahisgutan nga dapit sa pagdahili sa yuta.
Kahinumduman nga una ng gipatuman ang force evacuation sa mga residente nga nanimuyo sa Mt. Apo sa Bansalan, Davao del Sur gumikan sa namatikdan nga landslide ug namatikdan nga mga tension cracks human ang sunod-sunod nga pagtay-og.
Gitataw sab ni Barangay Captain Sixto Taparan nga mihumok ang yuta human ang pipila ka adlaw nga mga pag-ulan gawas sa mga liki sa mga yuta. Mibakwit ang anaa sa 80 ka mga pamilya sa ilang tagsa-tagsa ka mga panimalay sa Purok Pluto, Sitio Balutakay Brgy. Managa, Bansalan Davao del Sur.
Kahinumduman nga nagpahigayon ug inspection kaniadtong Nobyembre 6 ug 7 ang mga sakop sa Mines and Geosciences Bureau MGB human ang kusog nga mga pagtay-og.
Human nga makumpirma nga delikado na ang sitwasyon gilayon kini nga nagpatuman ug force evacuation. Mibalik lamang sa ilang pinuy-anan ang mga residente aron nga pangkuhaon ang ilang mga nabilin nga butang.
