DAVAO CITY – Mobalhin na sab og lain nga lugar ang mga residente nga mibakwit sa Malalag Davao del Sur kini human nangandam na sab karon ang Department of Education (DepEd) sa nahisgutan nga lalawigan sa pagpadayon sa klase karong adlaw nga lunes.
Kahinumduman nga adunay upat ka mga evacuation center ang Malalag diin sagad niini mga tulonghaan hinungdan nga kinahanglan mobalhin na sab og lain nga dapit ang mga bakwit nga nagtukod og tent nga nagsilbing temporaryo nila nga panimalay human ang nahitabong sunod-sunod nga linog sa milabay nga tuig diin daghanang mga residente ang apektado human nga pipila sa ilang mga panimalay ang nangadaut ug kinahanglan nga ipailalom sa pagkumpuni.
Nasayran nga sa Malalag Elementary School, aduna sumala pay kapin 100 ka mga pamilya ang nagpabilin.
Sumala sa pamunuan sa tulonghaan, gihatagan lamang og 15 ka adlaw sa DepEd ang mga bakwit nga magpabilin sa mga tulonghaan aron nga makapangandam sab sila sa pagpadayon sa klase sa adlaw nga lunes. Nasayran nga hangtud Enero 4 lamang ang gitagal sa mga bakwit nga mobalhin ug lain nga dapit.
