DAVAO CITY – Nagpahayag karon og pahasubo ang City Director ingon man mga personahe sa Davao City Police Office (DCPO) human ang kamatayon ni PSSG RENANTE MERCADO kagabii diin aksidente sumala pa niini nga napusilan ang iyang kaugalingon samtang anaa sa iyang duty.
Sa mensahe nga gipagula sa Davao City Police, nagpadayag sila ug pahasubo sa pamilya ni Police Staff Sergeant Renante Dapa Mercado nga nakitang wala nay kinabuhi human nga aksidente sumala pa nga napusilan niini ang iyang kaugalingon sulod mismo sa Police Station 2-San Pedro Police Station.
Hangtud karon dili pa gihapon makatuo ang kapulisan sa maong insidente gumikan kay usa sa ilang mga kaubanan ang mipanaw.
Gihangyo lamang karon sa DCPO nga dili magpakatag ug sayop nga mensahe sa social media isip paghatag ug respeto sa namatay nga police officer ingon man sa pamilya niini.
Gipasalig sa kadumalahan sa kapulisan nga makadawat ang pamilya sa biktima ug gikinahanglan nga hinabang niini.
Tungod sa maong insidente, subling gipahimangnoan ang mga sakop sa kapulisan nga kinahanglan magbinantayon kanunay sa paghupot sa ilang service firearms.
Gimandoan sab karon ang mga hepe, Administrative ug Resource Management Unit nga mopahigayon ug Refresher Course sa Gun Safety and Responsible Gun Ownership Seminar sa pipila ka mga personahe ug i-re-echo ang ilang mga nakat-onan ngadto sa ilang tagsa-tagsa ka mga police station.
Magsilbi sumala pa kini nga review kung paunsa nila huptan ang ilang service firearm ug malikayan ang susama nga insidente sa umaabot nga panahon.
