Gipaimbestigahan na sa mga kongresista ang gigikanan sa gatusan ka mga birth certificate nga gigamit kuno sa mga Chinese aron makakuha ug Philippine passport aron magpabilin ug makanegosyo sa nasud.
Gipahayag ni Representatives Cheeno Miguel Almario (Davao Oriental), Jay Khonghun (Zambales), Zia Alonto Adiong (Lanao del Sur), Jil Bongalon (Ako Bicol party-list), Paolo Ortega (La Union), Rodge Gutierrez (1-Rider party-list) ug Inno Dy V (Isabela) makabalaka ang report sa National Bureau of Investigation (NBI) nga halos 200 birth certificate ang nahatag sa local civil registry sa Sta. Cruz, Davao del Sur sa mga Chinese national.
Nadakpan sa mga sakop sa NBI si Hengson Lemosnero o Hanlin Qiu sa Department of Foreign Affairs office sa Ecoland ning dakbayan sa Davao, homan nag-apply aron makakuha ug Philippine passport ginamit ang peke nga birth certificate.
Dugang pa nga mamahimong adunay links sa mga kriminal ug drug syndicates ang mga Chinese nationals nga nahatagan ug peke nga birth certificates.
