DAVAO CITY – Gi-awhag sa Department of Health (DOH) XI ang mga pasahero nga nakasakay sa susama nga eroplano diin misakay sab ang labing unang pasyente sa COVID-19 sa Davao region nga miabot kaniadtong Pebrero 29 nga moadto sa pinakaduol nga health center.
Sumala pa kang Dr. Cleofe Tabada, head sa Regional Epidemiology and Surveillance Unit sa DOH XI, nga gipahimangnoan niya ang uban nga mga pasahero nga anaa sa susama nga eroplano nga moadto sa pinakaduol nga local health center o motawag sa DOH aron nga matabangan sila sa mga health personnel.
Gitataw sab ni Tabada nga nakiglambigit na ang Bureau of Quarantine ngadto sa PAL management alang sa manifesto sa flight.
Dako sumala pa ang tsansa nga mamahimong natakbuyan na sab ang uban nga pasahero sa nahisgutan nga eroplano.
Kahinumduman nga si Patient 130, o PH130, mao ang 21 anyos nga babaye nga miabot sa Davao kaniadtong Pebrero 29 gikan sa Manila ug gikan usab sa iyang biyahe sa United Kingdom dayon nag-lay over sa Doha, Qatar.
Padayon sba karon ang gipahigayon nga contact tracing sa mga paryente ug higala sa pasyente aron nga mapailalom gilayon kini sa quarantine.
