DAVAO CITY – Gipanaad sa lokal nga kagamhanan sa dakbayan sa Dabaw nga dili mohunong ug magpadayon lamang gihapon sa pagtabang sa mga pamilya nga nahimong biktima sa dakong trahedya nga nahitabo unse ka tuig na ang nakalabay nga mao ang dakong pagbaha sa Matina Pangi ning dakbayan nga nahimong hinungdan sa pagkamatay sa 32 ka mga indibidwal.
Kahinumduman nga pinaagi sa CSWDO, nanghatag ang City Government of Davao og mga food packs ug cash assistance ngadto sa mga pamilya nga apektado sa 2011 Matina Pangi flash flood.
Niadtong adlaw nga martes, June 28, 2022, gihinumdom ang ika 11 ka tuig sa trahedya nga mipatay sa 32 ka mga tawo.
Gikanayon ni CSWDO Assistant Department Head Perla Redulosa, nagpadayon lamang gihapon ang syudad sa paghatag ngadto sa mga flash flood victims og financial support bisan pa man og 11 ka tuig na ang nakalabay.
Walay plano nga ihunong ang maong tabang ug magpadayon lamang gihapon hangtud sa mosunod pang mga katuigan.
Sumala pa ni Redulosa, wala lamang nakighiusa ang syudad sa komunidad sa paghinumdom sa mga biktima sa trahedya kung dili tumong usab niini nga mapabiling lab-as ang mga nahitabo niadtong June 28, 2011 sa panghuna-huna sa mga dabawesnyo aron magsilbi kini isip usa ka dakong leksiyon nga kanunay nga magbinantayon.
Gipamugos sa opisyal nga angayang maminaw kanunay sa mga advisories gikan sa mga otoridad ilabi na kung adunay mga pagbaha nga mobiya dayon sa ilang tagsa-tagsa ka mga lugar aron malikayan ang trahedya.
Samtang sa usaka pamahayag, gipaabot ni Mayor Baste Duterte ang pahasubo ngadto sa pamilya sa mga biktima ug sa mga nawad-an og pinoy-anan.
Sumala pa niini, nagbilin og dakong leksiyon ang pagbaha sa Matina Pangi nga mamahimong mahinumduman matag adlaw.
Gipanaad usab ni Mayor Baste nga siguruhon sa lokal nga kagamhanan ang padayong kaluwasan sa mga residente ug likayan ang susamang panghitabo nga masubli pa sa umaabot nga mga panahon.
Via || LJ Florendo
