DAVAO CITY – Suspendido ang kanhi presidente sa Davao Oriental State College of Science and Technology (DOSCST) ug laing tulo pa ka mga personahe sulod sa unom ka bulan ug walay madawat nga sweldo gumikan sa anomalya sa pagpalit ug laboratory equipment kaniadtong tuig 2006.
Adunay nakitang lig-on nga basehan ang Office of the Ombudsman aron nga pasakahan si president Jonathan Bayogan, Airma Ladera (chairman sa Bids and Awards Committee), Vivian Labasano (OIC-director for administrative services) ug Erlinda Patosa (BAC member) tungod sa paghimo ug mga lakang nga supak sa balaud.
Gikanayong pakyas ang mga nahisgutan ug wala misubay sa Government Procurement Reform Act (Republic Act No. 9184) dihang gipalit ang mga ekipo kaniadtong tuig 2006.
Subay sa imbestigasyon sa OMB-Mindanao nasayran nga kaniadtong March 2006, mipalit ang DOSCST ug supply ingon man ekipo sa ilang Funda Laboratory nga wala mi-agi ug public bidding ug walay gi-aprubahan nga budget alang sa kontrata.
Gimandoan karon sa Ombudsman ang regional director sa Commission on Higher Education nga ipatuman gilayon ang suspension order batok sa mga nahisgutan.
