DAVAO CITY – Nagmalampuson ang 10th Infantry Division sa pagpuhag sa mga rebeldeng grupo hinungdan sa pagkab-ot sa Insurgent-Free status dinhi sa Davao Region sa nakalabayng tuig.
Subay sa datos nga nahipos sa 10ID kaniadtong Enero 1 hangtud Disyembre 31 sa miaging tuig, nabungkag ang upat ka guerilla fronts nga GF Alip, GF 2, GF 3 ug GF 18; upat ka sub-regional committees nga SRC 1, 2, 4 ug 5; ug tulo ka mga vertical units sa NPA nga gilangkuban sa Sub-Regional Guerilla Unit sa SRC 2, SRGU sa SRC 5, ug Regional Sentro De Grabidad of the Regional Operations Command.
Sa susamang panahon, nahitabo ang 34 ka mga engkwentro nga naka-alkontra sa 445 ka mga myembro sa NPA diin sa maong ihap, 19 ang gipatay, 27 ang nasikop, ug 339 ang mitahan sa sabakan sa gobyerno. Lakip sa mga na-neutralize nga mga lideres sa NPA mao sila Guerilla Front 3 Secretary Maximo Catarata alias SM; Leo Lacumbo alias Oli, Commanding Officer sa Regional Operations Command; ug Guerilla Front 2 Secretary Rosefel Movera alias Dandan.
Nakasignit sab ang 10ID ug 276 ka mga high-powered ug 31 ka low-powered nga mga armas.
Pinakadagkong kalampusan sa kasundaluhan sa tuig 2022 ang pagkadeklara sa Davao Region isip insurgent free, subay sa Resolution Number 07-2022 nga gipagawas sa Regional Peace and Order Council nga nagpatuod sa paghawan sa tanang guerilla units sa New People’s Army dinhi sa rehiyon.
Gikanayon ni 10ID Commander Major General Nolasco A. Mempin, ang maong kalampusan sa kasundaluhan gumikan sa pagtinabangay sa Regional Task Force to End Local Communist Armed Conflict 11, mga stakeholders ug ang tanang katawhan sa rehiyon.
Dugang ni Mempin nga dili mabalit-ad ang kapildihan sa mga koministang grupo sa rehiyon. Nakighiusa sab niini ang mga kanhi rebelde aron subling tapuson ang lima ka dekadang insurhensiya sa Davao Region.
via || Bombo LJF
