DAVAO CITY – Nagpahibalo ang Davao City Central 911 ngadto sa katawhan nga mutawag lamang sa 911 hotline panahon sa emerhensiya.
Gibutyag ni Lyndon Ancajas, Administrative Officer sa Davao CDRRMO, misaka matud pa ang ilang madawat nga mga non-emergency calls sa nakalabayng tuig.
Sa natalang 394,531 ka mga tawag, 12.24% kon 48,316 lamang ang natala nga emergency calls.
Ang nahibiling 346,215 ka mga tawag ang gipunting nga mga non-emergency calls diin gilangkuban sa mga nuisance calls, test calls, ug uban pang klase sa tawag gawas sa emergency situations nga nagkinahanglan og medical assistance.
Matud pa ni Ancajas, ang mga bogus ug prank calls, makaapekto sa operasyon sa Central 911 nga nagapahunong sab sa pagsulod sa mga labing importanteng tawag gikan sa mga labawng nangayo og tabang.
Dungang hangyo sa opisyal nga mamahimong responsable sa paggamit sa emergency hotline aron paspas sab nga makaresponde ang emergency team sa labing daling panahon.
via || Bombo LJF
