DAVAO CITY – Dili na mamahimong makapaninda sa Roxas Night Market ang mga vendors nga mosupak sa gipatuman nga health protocols sa syudad.
Kini ang pahimangno ni Davao city Mayor Inday Sara Duterte Carpio human subling gi-abrihan ang night market niadtong milabay nga semana.
Sumala ni Mayor Inday Sara, bisan kanus-a dili na gayud tugutan pa sa syudad nga makapaninda sa Roxas Night Market ang mga vendors nga dili motuman sa gipatumang mga sumdaban sama na lamang sa pagsul-ob ug facemask, faceshield, ug social distancing.
Dugang pa sa Mayor, mahinungdanon nga makita sa katawhan ang istriktong pagpatuman sa health protocols aron magpadayon ang pag-adto sa night market.
Na-una nang gipasigarbo sa mayor ang maayong dagan sa unang adlaw sa pag-abri sa night market bisan ug pipila pa lamang ka mga tawo ang miadto.
Hinuon, sa misunod nga mga adlaw, inanay nang midaghan ang mga tawo human nakita nga maayo nga pagka-plano sa syudad sa seguridad ug sa mga health protocols.
