DAVAO CITY – Nabalaka ang mga negosyante sa Davao City sa padayong pagburot sa inflation sa syudad sa Davao. Gumikan, dako matod pa ang epekto sa pagsaka sa presyo sa palaliton, ngadto sa demand ug babag usab kini sa paglambo sa local establishment.
Kini ang gipasibaw ni John Tria ang Vice president sa Davao City Chamber of Commerce and Industry Inc., Sumala ni Tria, angay kabalak-an ang inflation gumikan mag resulta matod pa kini, sa domino effect, busa kinahanglan nga ma-manage kini sa syudad aron mapadali ang recovery sa lokal nga ekonomiya nga labing naapektuhan gumikan sa COVID-19 pandemic.
Aminado si Tria, nga sa unang bahin ning kasamtangang tuig, “transitional” matod pa ang ilang nakitang inflation niadtong higayona, gumikan sa gitawag nga “revenge spending” sa mga tawo human nga gipaluagan ang covid-19 restrictions sa syudad. Pero ang namatikdan nga inflation ning kasamtangan, dili makonsiderang “transitional” gumikan sa taas nga consumer price index.
Aminado ang opisyal sa Davao City Chamber of Commerce and Industry Inc., nga wala pay kaseguradohan kon kanus-a mobaba ang inflation.
Kon basehan ang report nga gi-release sa Philippines Statistics Authority niadtong Nobyembre 4, nitala ang Davao Region 9.8% inflation rate niadtong bulan sa Oktubre, diin sigon sa PSA pinakataas matod pa kini gikan sa desi syete ka rehiyon sa nasud.
Gitumbok sa PSA ang nag-unang hinungdan sa pagsaka sa inflation nga mao ang paglihok sa presyo sa alcoholic beverages and tobacco nga nitala ug 12.2% gikan 10.3% niadtong September, ingon man ang food and non-alcoholic beverages nga dunay 11.7% gikan 10.5% sa bulan sa September.
