DAVAO CITY – Insakto lamang ang gihimo ni Mayor Inday Sara Duterte nga subling pagpatuman sa 24 hour liquor ban sa dakbayan sa Dabaw.
Gikanayon ni Dr Ashley Lopez, hepe sa Vices Regulation Unit (VRU) sa syudad, angayan lamang nga pitulon ang mga tao gumikan sa pagpasagad niini nga maoy hinungdan sa padayon pagtaas sa kaso sa covid 19 sa syudad.
Gibutyag ni Lopez nga mo-abot sa 400 hangtud 500 ka kaso ang average sa apprehension nga ilang matala matag adlaw kung diin kadaghanan niini adunay history sa inum.
Nahimo na sumala pang iresponsable ang katawhan sa ilang katungdanan nga pagtuman sa gipahimutang nga mga health protocols ug guidelines sa gobyerno aron pakigbatukan ang virus.
Sukad giwagtang sumala pa ni mayor Inday Sara ang 24 hour liquor ban, wala nay limit ang mga tawo sa mga panagtapok-tapok nga kasagaran adunay mahitabo nga drinking session.
Pipila usab sumala pa sa mga nadakpang nakalapas sa curfew hour ang gikan mitambong ug birthday party ug uban pang mass gatherings diin adunay nahitabo nga pag-inum ug ilimnong makahubog.
Sa pikas bahin, gipahinumdom usab ni Dr Lopez ang gipatumang 1 strike rule sa syudad, diin kadtong mga madakpang nakasupak sa health protocol ang pasakaan gilayon ug kasong kriminal.
Nanawagan usab kini sa mga barangay officials ug mga barangay tanud nga istriktong i-monitor ang ilang tagsa-tagsa ka mga dapit sanglit sila ang mas nasayud sa dagan ug kalihukan sa ilang mga residente.
