DAVAO CITY – Niabot na sa dul-an 30,000 ang ihap sa mga indibidwal sa Davao Region ang ni-file og certificate of candidacy sulod sa tulo ka adlaw human sa pag-file sa COC alang sa Barangay ug Sangguniang Kabataan Election 2023.
Sumala ni Atty Gay Enumerables, assistant regional director sa Comelec Davao, talagsaon ang pagsaka sa mga mupapili karong BSKE.
Subay sa datos sa buhatan, 1,942 ang ni-file para sa Punong Barangay, samtang 16,034 ang mudagan pagka-Kagawad.
Mokabat sa 1,661 ka mga batan-on ang nisumiter sa ilang kandidatura pagka-SK chairperson samtang 8,339 alang sa SK members.
Nagpadayon ang buhatan sa pagdawat sa mga COCs sa mga mupauili sa piniliay sa barangay hangtod sa Setyembre 2, 2023.
Sa laing bahin, nangayon og alokasyon ang Davao City Treasurer’s Office ug ang Commission on Elections gikan sa 2023 Supplemental Budget 1 alang sa umaabot nga BSKEs.
Ang CTO nangayo og kinatibuk-ang kapin P12 million alang sa BSKE, samtang gipangayo sa COMELEC ang alokasyon nga P6.5 million, nga giingon nga gamiton sa pagbansay ug gasto sa pagbiyahe nga may kalabotan sa umaabot nga lokal nga piniliay.
Pagakuhaon ang maong bagyet gikan sa proposed appropriation nga muabot sa P2.5 billion diin kini maggagikan sa available source, lakip na ang surplus sa 2022, Reversion of Current Year and Prior Years Appropriations, ug ang 15% Share of Collection gikan sa Office of the Building Official.
