DAVAO CITY- Gikustudiya na karon sa Explosive Ordnance Division sa Davao City Police Office ang tulo ka mga bala nga narekober kaganihang udto sa Baranggay Centro Agdao ning dakbayan sa Davao.
Subay sa report gikan sa Sta. Ana PNP, pasado alas 12:00 ang takna kaganihang udto nakadawat kini ug report gikan sa nasampit nga barangay kabahin sa narekober nga eksplosibo.
Gilayon nga gisubay kini sa kapulisan pinaagi ni PCMS Adnan Ahadain sakay sa Mobile Patrol No. 15 kauban si PSSg Hassem aron sa pagberepika sa nasampit nga report.
Sa pag-imbistiga sa kapulisan, nasayran nga tulo ka mga bala sa Mortar ang nadiskubrihan sulod sa Baranggay Hall.
Sumala pa nga kaganihang buntag usa ka Barangay Kagawad sa Barangay Centro Agdao, ug mga kaubanan ang naghakot ug basura gamit ang Barangay Multicab.
Pagka-alas 10:00 kaganihang buntag, nibalik sila sa Barangay Hall samtang nagpahiluna sa ilahang gihakot nga basura apan ilaha na lamang nakit-an ang tulo ka mga unexploded nga mortars.
Sa karon gipahigayon ang dugang imbistigasyon kabahin sa narekober nga eksplosibo.
