DAVAO CITY – Gikabutyag sa DPWH Davao nga pipila sa mga luna nga maigo sa pagatukurong Samal Island Davao City Connector ang nabayaran na sa gobyerno pinaagi sa expropriation.
Sumala ni DPWH Davao spokesperson nga si Dean Ortiz, gikordon na ang dagkong luna sa may Lanang ning dakbayan nga pagatukdan sa Davao City portion sa maong tulay.
Dugang pa ni Ortiz nga tulo sa singkwentay-singko ka mga luna sa Davao City ang gihatagan na og writ of possession sa gobyerno ngadto sa mga pribadong tag-iya sa yuta.
Samtang, nahimong hapsay ang pag-settle ug pagbayad sa mga napulo ka luna sa may SamaI Island.
Gisang-at na sab ang disenyo sa maong proyekto ngadto sa DPWH Engineering alang sa approval niini.
Gipasalig sa opisyal nga bisan pa man sa pagkadilatar sa maong proyekto gumikan sa suspension ug right of way issues sa gobyerno, ubay-ubay sab ka mga lakang ang ilang gihimo aron mapadayon ang pagtukod sa tulay.
Una nang gikabutyag ni DPWH Secretary Manuel Bonoan nga posibleng hingpit nang masugdan ang proyekto sa unang bahin sa musunod nga tuig.
