DAVAO CITY – Gipahimangnoan ang mga residente sa dakbayan sa Davao ingon man Caraga sa Davao Oriental nga dili pa gihapon magpakampante bisan nga pabilin pa gihapon sa mas luag nga alert level 1 ang dakbayan sugod karung adlawa hangtud na sa Mayo 15 gumikan kay daku pa gihapon ang bahad sa laing hugna sa coronavirus disease (Covid-19) surge.
Kahinumduman nga gawas sa duruha ka mga lugar, gi-anunsiyo sab karun sa Inter-Agency Task Force for the Management of Emerging Infectious Diseases (IATF) ang mga lugar sa Davao del Norte, Davao del Sur, Davao Oriental, Davao de Oro ug Davao Occidental nga ilalom sa Alert Level 2.
Sumala sa Department of Health (DOH), nga kung dili pa gihapon mutamod ang publiko sa minimum health protocols ug pagsulod karun sa bag-ong Covid-19 sub-variants sa nasud, laoman nga paspas na sab ang pagtakud-takud sa kagaw ilabi na nga giila kini karun isip highly-transmissible Omicron variant sa Covid-19.
Kahinumduman nga una ng na-detect sa mga Health authorities ang labing una nga kaso sa Omicron BA.2.12 sub-variant sa nasud nga adunay 44 ka mga close contacts sa mga siyudad sa Quezon ug Baguio.
Ilalom sa Alert Level 1, tanan nga mga restriction kalakip na ang venue o transportation capacity ingon man travel ang tangtangon ug ang tanan nga mga negosyo ang tugtan nga maka-operate.
Wala nay restrictions alang sa vulnerable population sama sa mga bata, senior citizens ug persons with comorbidities hinungdan nga gitambagan ang publiko nga padayon nga mutamod sa minimum public health protocols ilabi na sa pagsuot ug facemask ug imentina ang physical distancing arun nga malikayan ang resurgence sa Covid-19 cases sa nasud.
Una na sab nga gikanayon sa DOH nga ang Alert Level 1 mamahimong makonsidera isip “new normal.”
