DAVAO CITY – Mamahimo matud pa nga pahamtangan og disciplinary action ang mga professionals nga usa sa mga mipirma sa mga dokumentong may kalabutan sa naghitak karon nga pagpamaligya og raw lots dinhi sa dakbayan sa Davao.
Kini mao ang ginalantaw nga lakang karon sa Regional Task Force Against Illegal Real Estate.
Sumala ni City Planning and Development Office Head Engr. Ivan Cortez nga maayo ug sakto ang maong lakang gumikan nagtumong kini nga mapanalipdan ang katawhan nga dili mailad ug madasig sa pagpalit og mga raw lots nga wala diay igong permit gikan sa panggamhanan alang sa housing development.
Gikumpirma sa maong opisyal nga aduna matud pay kalambigitan ang pipila ka mga lisensyadong indibidwal sa naghitak nga pagbaligya og raw lots diin mao matud pa kini ang rason kung nganong daghan ang nadani nga mga buyers.
Sa pikas bahin, gumikan kabahin ang Professional Regulation Commission o PRC sa Regional Task Force Against Illegal Real Estate, mamahimo matud pa kining mupahamtang og disciplinary action o dili ba kaha mamahimo niining kanselahon ang lisensya sa mga nahisgutan.
Nasayran nga lakip ang pipila ka mga realtors ug geodetic engineers ang mipirma sa mga dokumento.
