DAVAO CITY – Taliwala sa kahigpit sa mga balaod sa dakbayan padayon nga naghitak ang mga pagsupak sa pipila ka mga KTV Bar sa dakbayan sa Liquor ban ug anti-smoking ordenance.
Atol kini sa pagsuhid sa mga otoridad sa duha ka mga KTV Bar sa Sta. Ana Avenue sa pagpanguha sa Vices Regulation Unit ug sa Sta. Ana Police Station Police Station.
Tulo ka mga kalalakin-an ang gipangposasan human nga nagdumili sa pagpirma sa citation ticket nila gumikan sa pagsupak sa liquor ban.
Lakip sa mga na-aktohan sa KTV Bar mao ang grupo sa mga Taiwanese nationals depensa sa mga langyaw nga wala sila masayud sa liquor ban ordinance.
Sumala kang Vices Regulation Unit enforcer Ramon Fernandez dili na magsilbi ang alibi sa mga langyaw nga wala masayud sa mga ordenansa gumikan kay gipangpaskin kini sa mga establisamento.
Duha sab ang gipangtikitan gumikan sa paglapas sa anti-smoking ordinance sa dakbayan.
Sumala sa Vices Regulation Unit sa dakbayan, kini na ang ikatulo ka higayon nga nahatagan ug liquor ban citation ticket ang KTV Bar, samtang second offense kini sa paglapas sa anti-smoking ordinance mao nga dili lamang multa ug pagka-preso ang atubangon sa tag-iya apan ma-revoke sab ang business permit niini.
Subling pahimangno ni Police Captain Angelito Tapi, Deputy Station Commander sa Sta. Ana Police pag-hagtok sa ala 1:00 sa kaadlawon gi-dili na ang pag-inum ug ilimnong makahubog sa mga establisamento.
Lakip sab sa gisuhid sa Anti-Smoking ug Liqour Ban Task Force ang usa ka Bar sa Obrero ning dakbayan nga bisan ala 1:00 na ang takna sa kaadlawon wala pa gihapon nahuman ang tagay ug padayon nga inum.
