Dako ang pagtuo ni Ramon Beleno III, usa ka political analyst nga dunay mamahimong ‘sacrificial lamb’ sa resulta sa imbestigasyon sa anomaliya sa flood control project.
Gani, di matud pa mutoo si Beleno nga walay nahibal-an ang pangulo sa anomaliya sa flood control projects gumikan ayha nga ipaguwa ang budget, ginapirmahan kini ni Pang. Ferdinand Marcos, Jr.
Dugang pa niini nga di gayod mamahimong kasuhan sa pangulo ang mga politikong nalambigit sa anomaliya ug dako matud pa ang puruhan nga ang mga anaa lamang sa ubos nga posisyon sama sa mga district engineers ang palagputon sa ilang posisyon.
Mibutyag sab si Beleno nga ang nahimong pagpangunay og imbestiga sa pangulo sa mga ghost flood projects usa lamang ka matang sa ‘political survival’ sa Marcos administration.
Gani, human sa mga nagkatag nga hungihong nga hulipan si DPWH Sec. Manual Bonoan, dako gihapon ang pagtuo ni Beleno nga di mamahimong ilambigit ni Marcos ang labaw sa DPWH, ilabi na ang iyang mga paryente.
