DAVAO CITY – Gikabutyag sa datos sa Department of Health ang pagsaka sa mga kaso sa COVID19 dinhi sa Davao Region.
Sumala sa pinakaulahing report sa ahensya as of April 10, usa ang rehiyon sa dunay pinakadaghang kaso sa maong kagaw mga mukabat sa 375 sulod sa 14 ka adlaw.
Samtang pinakauna ang National Capital Region nga dunay 1,074 ka mga kaso.
Kadaghanan sab sa mga kaso, gikan sa Davao City nga dunay 282.
Samtang sa kinatibuk-ang rehiyon, natala ang 50 ka kaso diin 30 niini gikan sa Davao de Oro, 26 sa Davao del Norte, 19 sa Davao Oriental, ug 12 ka kaso sa Davao del Sur.
Sumala sa OCTA Research Group, ang Davao del Sur lakip Davao City ang nakatala og pinakataas nga positivity rate nga anaa sa 12.2% kon itandi sa ubang probinsya sa tibuok nasud.
Gibana-banaang muabot sa 100 hangtud 150 ang mga matalang bag-ong kaso sa COVID 19.
Gumikan niini, gipapaigmat sa Davao City Healh Office ang katawhan gumikan sa gikatahong pagsaka sa ihap sa mga nataptan sa COVID19 dinhi sa dakbayan.
Sumala kang Dr. Marjorie Culas, City Health Officer, mukabat sa 7-10% ang namatikdang positivity rate sa maong kagaw sugod kaniadtong bulan sa Marso, diin mas taas kini sa gitaganang 5% positibity rate sa World Health Organization.
Sigun sa pinakaulahing monitoring gikan sa DOH, nasa 208 ang mga aktibong kaso, ug 5 ang namatay sa maong kagaw.
Gipanawagan karon sa buhatan ang batasanong pagbuhat sa mga health protocols sama sa paghugas og kamot, pagdisinfect, lakip na pagsuot og face mask.
Samtang, mamahimo sab nga mudangop sa pinakaduol nga district health offices alang sa libreng RT-PCR test kon makasinati og sintomas sama sa sip-on, ubo ug hinalat.
Gikatakdang makigpulong karong adlawa ang DOH-Davao, City Health Office, ug ubang mga ospital aron hisgutan ang posibleng surge sa COVID19 sa dakbayan.
via || Bombo LJF
