DAVAO CITY – Naipit ang tanang mga Kababayan sa nahitabong gubat sa nasud Israel diin subling mibalik sa nasud ang pwersa sa grupong Hamas nga gikonsidera karong pinakamatay nga pag-atake sukad tuig 1973.
Sa pakighinabi sa Bombo Radyo Davao ngadto kang Jerick Uson nga pipila ka tuig nang nagtrabaho sa nasangpit nga nasud isip caregiver, tataw sa OFW ang tumang kabalaka, kakuyaw ug kakulba dungan sa nagpahinabong pag-atake sa mga terorista.
Dugang pa, mao na kini ang pinaka-grabe nga giyera nga nasinatian karon sa Israel.
Pagpamatuod niini ang lugar kung asa nitindog si Jeric aron pagbutyag sa mga kasinatian niini atol sa pag-ulbo sa gubat.
Kon kaniadto, buhi ang komersyo, apan karon napuno na kini sa kamingaw.
Pagbutyag sab ni Jerick, nabalaka sab kini sa pipila niyang mga kababayan nga nadestino sa utlanan.
Saysay pa sa atong kababayan, walay tulogay na sa ilang gikahimutangan gumikan sa mga pagbusikad.
Hinuon, gipasalig ni Jerick ngadto sa mga pamilya dinhi sa Pilipinas nga nakatutok karon ang embahada sa gipahigayong repatriation alang sa mga OFW.
Kon ugaling musamot pa ang tensyon, adunay kasilungan nga shelters ang atong mga kababayan.
Bisan pa man sa luwas nga kahimtang ni Jerick, naghangyo na lamang kini nga panalanginan siya ug atong mga kababayan nga natanggong karon sa Israel.
Sa pikas bahin, gihulagway ngadto sa Bombo Radyo Davao sa Bombo International News Correspondent sa Israel nga si Tony Tagama ang kalahi karon ning kasamtangang gubat tali sibliyan ug mga pwersa sa militante.
Sumala pa, dungan sa pagbinayloay og pusil ug bomba, nagapahinabo sab ang pagpangidnap ug pagpatay sa mga sibilyan sa halos ubang bahin sa Gaza Strip.
Sa nagpadayong tensyon didto sa Israel, nagdeklara na ang ilang estado og all-out war batok Palestine diin sa pagkakaron, anaa na sa 700 ka mga Israelies ang gipatay sa mga myembro sa grupong Hamas, ug dul-ang dosena ka mga tawo ang gipang-abduct.
Isip tubag sa Israel, gitirahan sa ilang pwersa ang mga kabalayan ngadto sa mga myembro sa Hamas officials sa Gaza nga gikamatyan sa kwatro syentos ka mga tawo, lakip baynte ka mga bata, sumala sa kumpirmasyon ni Prime Minister Benjamin Netanyahu.
Samtang dunay gikatahong 30 ka mga Israelis ang nangawala samtang nagsalmot sa usa ka dance party dihang giatake kini og mga armadong lalaki.
Anaa sa dos syentos saisenta ang nakabsan sa kinabuhi. Nagtanyag na og suporta ang ubang mga lideres sa nasud diin nanguna niini si US President Joe Biden.
Hugot sab nga gikondena ni Pangulong Bongbong Marcos ang nahitabong surprise attacks sa Israel.
Gipaaktibo na sab sa gobyerno ang tabang nga ihatag lakip repatriation ngadto sa atong mga kababayan nga na-stranded sa nasud Israel.
via || Bombo LJF
