DAVAO CITY – Gikalipay karon sa daghanang investors ang nahimong kamanduan sa korte sa Bislig City nga ipadakop ang gikanayong utok sa investment scam nga Kabus Padatoon nga si Joel Apolinario ug mga kaubanan niini.
Gikanayong daghanang mga investors sa Bansalan Davao del Sur ang nanghinaut pa gihapon nga mabalik ang ilang gi-invest nga kuwarta ilabi na nga kadaghanan sumala pa kanila ang gipangprenda ang umahan.
Sumala kang alyas Rosa, residente sa nahisgutan nga dapit, hangtud karon nagpabilin pa gihapon nga naka-prenda sa usa ka negosyante ang ilang basakan diin nagkantidad sumala pa kini og P300,000.
Tungod kay nagsira na ang KAPA, nagproblema sila karon kung paunsa nila mabawi ang maong yuta ug makapadayon sa ilang pag-uma.
Kahinumduman nga usa lamang si alyas Rosa sa liboan ka mga investors nga naminghoy human nga hingpit nga gipagula ang kamandoan sa pagpasira sa maong kompanya.
Kahinumduman nga subay sa kamanduan, kalakip sa mga gipasikop sila si Margie A. Danao ug corporate secretary Reyna L. Apolinario uban sa mga promoters nga sila Marisol S. Diaz, Adelfa Fernandico, Moises Mopia ug Reniones D. Catubigan.
Ang mga nahisgutan susama nga nakasupak sa Republic Act 8799 o ang Securities Regulation Code.
