DAVAO CITY – Gikabalak-an karon sa mga environmental groups sa Davao City ang nahimong baruganan sa Japan International Cooperation Agency kon JICA mahitungod sa ilang kalambigitan sa pagatukurong waste-to-energy facility sa dakbayan. Pinaagi sa usa ka gipirmahang pamahayag, gikanayon nilang nahimong instrument ang buhatan sa pagila sa WTE technology sa dakbayan.
Gikwestyon sab nila ang kakuwang sa tulubagon sa JICA sa paghatag og sayop nga solusyon aron madumalahan ang waste management sa Davao City.
Sa susamang suwat nga gilagdaan sa 57 ka mga grupo gikan sa nagkalain-laing nasud sama sa Malaysia, Vietnam, China, Indonesia, India, Bangladesh Mongolia, South Africa, Tanzania, and Argentina, United Kingdom, ug Estados Unidos; lakip ang Ecoteneo, Interfacing Development Interventions for Sustainability kon IDIS, ug uban pang mga environmental NGOs sa nasud, ilang gipanawagan ngadto sa JICA nga subling di na mangilabot pa sa maong proyekto.
Nasayran nga kaniadto pang tuig 2010 ang involvement sa JICA alang sa maong pasilidad pinaagi sa developmental assistance nga nagmugna og kolaborasyon sa paggamit og Japanese technology.
Gilagdaan sa mga gobyerno sa Japan ug Pilipinas ang usa ka kasabutan nga naghatag ug dugang og kapin P5.23 million nga kantidad sa WTE facility.
Dugang pa sa mga grupo, nakiglambigit ang JICA sa maong proyekto nga walay husto nga konsultasyon sa mga katawhan sa Davao City.
Gipunting usab sa grupo ang resulta sa ilang natigayong feasibility study na kadaot ang hatud sa kinaiyahan sa mga WTE incinerators, butang nga gibatukan sa mga balaod sa nasud sama sa Clean Air Act ug Solid Waste Management Act.
Una nang gibarugan sa JICA nga wala nila gisuportahan ni gipundohan ang maong pasilidad.
via || Bombo LJF
