DAVAO CITY – Hugot ang pagtamud karon sa tanang mga empleyado ning lokal nga panggamhanan sa Davao sa gipagulang Davao City Government Guidelines aron nga batokan ang Coronavirus Disease (COVID-19).
Ning kasamtangan, padayon gihapon karon ang operasyon sa mga empleyado sa City Hall ug Sangguniang Panlungsod luyo paman sa kahadlok sa nahisgutang balatian.
Apan gisiguro gayud sa tanang empleyado nga malikayan ang maong sakit pinaagi sa pag-disinfect sa ilang tagsa-tagsa ka mga opisina matag karon ug unya, kanunay nga paglimpyo sa ilahang mga areas ingon man ang kanunay ngas paggamit og hand sanitizers ug alcohol dili lamang alang sa mga empleyado apan lakip na sab ang publiko nga gabisita sa nagkadaiyang buhatan sa panggamhanan.
Subay niini, una ng gikansela ang Flag-raising ceremony sa Davao City Hall kaganihang buntag isip usa sab sa mga gipatumang preventive measures aron nga likayan ang dagkong panagtapok sa mga tawo.
Ginadili sab ngadto sa mga empleyado ang pagdawat og mga personal nga bisita.
Gawas sa hugot nga sumbanan alang sa mga empleyado, lakip sab sa nasangpit nga Davao City Government Guidelines ang pag-postpone sa pagselebrar sa mga araw ng barangay ngadto sa bulan sa Hulyo.
Gisugyot usab ngadto sa mga private sectors ang paglikay una sa pagpahigayon og mga dagkong events nga makahimo gayud nga maka-agni og daghanang mga tawo.
Gitambagan usab ang mga tulunghaan nga ipostpone una ang mga graduation ceremonies ngadto sa Hunyo ning kasamtangang tuig.
Sa pikas bahin, nasayran nga suspendido na sab ang History of Davao Light Show sa Davao City Hall matag gabii.
Ang tanang gihimong lakang ang subay sa deklarasyon sa national government sa Code Red Alert gumikan sa hulga sa COVID-19.
Nanghinaut na lamang karon ang panggamhanan nga magpabiling kalmado ug sundon ang DOH Advisories aron nga malikayan ang pagkatag sa nasangpit nga balatian.
