DAVAO CITY – Gikabutyag sa ig-agaw sa duha ka mga nakabsan sa kinabuhi atol sa pag-igo sa kilat sa Camp Madegger, Binaton, Digos City, Davao del Sur, nga maayong mga tawo ang unom ka mga biktima.
Nagmasulub-on pa dihang nakahinabi sa Bombo Radyo Davao si Miles Dominisac, ig-agaw nila Glendyn Joy Villocino ug Johnmel Felix Galicia.
Sumala pa ni Miles, nasayod siya nga dungan nga mangadto ang tulo ka paresan sa Camp Madegger, apan pagkagabii na lang niya nahibal-an ang nahitabo sa mga magbarkada human sa maong insidente bandang alas-6 sa gabii, niadtong adlawng Dominggo, Abril 9.
Nagdali-dali siya ug hapit sa ospital aron masayran ang kahimtang sa mga nahisgutan, apan ulahi na ang tanan dihang naplagan na lamang niyang pulos nakabalot na og tela ang ilang mga patayng lawas. Dugang pa ni Miles, but-an ug matinabangon ang mga biktima.
Kahinumdumang dungan nga nag-uban paingon Camp Madegger ang unom ka mga tawo nga giila sa Digos City Police nga sila:
Valerie Padillo Asutilla, 21-anyos taga Purok Manga, Barangay Kiagot, Digos City;
Glendyn Joy Martin Villasino, 23-anyos taga Purok Mahogany, Barangay Soong, Digos City;
John Gabrielle Hersalia, 15-anyos, taga-Kalubihan, Barangay. Cogon, Digos City;
Johnmel Felix Galicia, 19-anyos, taga Purok Acacia, Barangay Soong, Digos City;
Jeramae Gantalaw Cartagena, 18-anyos, taga Purok Narra, Barangay Soong, Digos City;
ug ang bugtong nakalingkawas sa kilat nga si Clarence Cate Chatto, 21-anyos.
Unang giangkon sa survivor nga si Clarence nga dili niya kauban ang upat ka biktima, apan nag-abot lang matod pa sila sa Camp Madegger.
Alas 4 sa hapon dihang mibundak ang kusog nga ulan, nagkasinabot sila nga musilong sa dakong payong nga nagsilbing cottage.
Una paman matod pa sila naigo sa kilat, duna nay nipaka sa distansya sa ilang nahimutangan. Wala na matod pa siya nasayod sa kung unsay nahitabo ug nakamata nalang siya nga naghigda sa gawas sa gisilongan nila.
Kabsan sa kinabuhi ang iyang trato nga si Valerie Asutilla nga gisulayan pa og tabang sa ospital. Gikabutyag ni Clarence nga nag-cellphone ang iyang mga kasabay nga minor de edad samtang nagpasilong.
Sa pikas bahin, masulub-on nga niadto sa Camp Madegger ang mga nabiyaang pamilya kagahapon sa buntag, agig paghinumdom sa nahitabong trahedya ug ang nagpabiling handumanan sa kamatayon sa mga biktima.
via || Bombo LJF and Bombo HJR
