DAVAO CITY – Makigtigom ang lokal nga panggamhanan sa tanan nga mga barangay officials, ilabi na sa mga lugar nga giilang dengue hot spots nga mohimo ug mga lakang aron nga masolusyonan ang kaso sa dengue.
Sumala pa kang Konsehal Mary Joselle Villafuerte, chair sa Health Committee sa City Council, kinahanglan nga mosalmot ang mga barangay officials tanan chairs ug council members karong adlawa Hulyo 30 sa ipahigayon nga tigom.
Gitataw sab ni Villafuerte nga siya ug ang iyang mga kaubanan nga konsehal nga sila si Ralph Abella ug Richlyn Justol ang buot sumala pa nga mohimo ug mga lakang batok sa dengue aron nga ila kining isugyot ngadto kang acting mayor Sebastian Duterte.
Una na sab nga nagpahigayon ug inter-agency meeting si Baste aron nga masubay ang ihap sa kaso sa dengue, unsa ang mga gihimo nga lakang ug unsa pa ang kinahanglan nga himuon.
Una ng nasayran nga base sa data gikan sa DOH Davao Region, sukad Enero hangtud Hunyo ning tuig kasamtangan, anaa sa unom ang natalang patay dinhi sa siyudad.
