DAVAO CITY – Padayun ang ginahimong depopulation sa Department of Agriculture region 11 sa mga baboy sa Don Marcelino, Davao Occidental diin natala ang pinakaunang kaso sa ASF dinhi sa Mindanao.
Sumala kang Ricardo Oñate Jr., regional director sa Department of Agriculture 11, 47% o 3,564 na ang ilang na-depopulate nga mga baboy sa Don Marcelino diin anaa usab sa 983 ka mga hog raisers ang apektado niini.
Subay sa datos sa DA 11, ang Don Marcelino dunay 7,751 ka mga baboy nga gikatakdang pamatyon.
Anaa usab sa 2,668 ka mga hog raisers ang apektado niini nga makadawat og P5,000 nga ayuda gikan sa DA 11.
Gawas sa nahisgutang tabang, nakig-alayon usab ang DA 11 sa Department of Labor and Employment (DOLE) ug sa Department of Social Welfare and Development (DSWD) sa rehiyon alang sa immediate assistance sa mga hog raisers ug sa mga indibidwal kansa apektado sa gipatuman nga no entry or selling og karne sa baboy sa auction market sa Sulop, Davao del Sur.
Sa karon, wala pa nasayran sa DA 11 kung kanus-a sila mahuman sa ilang depopulation sa Don Marcelino apan sumala pa, ila na kining ginapaspasan aron nga masunod na nila ang Malita, Davao Occidental.
