DAVAO CITY – Gi-surrender sa usa mga kaabag ni Kingdom of Jesus Christ (KOJC) founder Apollo Quiboloy ang anaa sa 21 ka armas dinhi sa Davao City.
Kini nga mga armas nga naglakip sa 18 ka mga handgun, duha ka rifle ug usa ka shotgun ang dungan nga gi-turnover sa representante sa KOJC ug legal counsel nga si Atty. Israelito Torreon ngadto sa Criminal Investigation and Detection Group (CIDG) 11 sa church compound sa Barangay Sasa bandang alas-7:30 sa buntag niadtong Sabado, Mayo 25.
Nasayran nga gipanag-iyahan ang maong armas ni Tamayong Village chief ug Barangay Captain Cresente “Enteng” Canada nga usa sab ka gun sports collector nga nakahukom nga itugyan ang tanan niyang lisensiyado nga mga armas ngadto sa regional office sa CIDG pinangulohan nila ni Police Col. Bernard Pagaduan ug Major Edgardo Bahan.
Kahinumdumman nga usa si Canada sa lima ka kaubang akusado sa child abuse ug qualified human trafficking nga mga kaso nga gipasaka batok kang Quiboloy atubangan sa mga korte sa Davao ug Pasig. Na-turn-over usab ang 14 ka bala sa kalibre .9mm nga pistola ug duha ka magazine sa CZ pistol.
Sayo niining buwana, mi-surrender ang kampo ni Quiboloy og lima sa 19 ka mga lisensyadong armas human niisyu og FEO license revocation order ang Civil Security Group (CSG) head office sa Manila niadtong Abril 26 ngadto kang Quiboloy.
Samtang gikanayon nga nahalin na ang laing 14 ka armas nga gipanag-iyahan ni Quiboloy. Gikalipay ni PRO 11 Director PBGen Aligre Martinez ang maong lakang ni Canada nga pakipagkooperar sa mga otoridad ug ang pagpamatuod nga aduna gihapon mipatigbabaw nga rule of law.
via || Bombo LJF
