DAVAO CITY – Gilaumang mabalhin na sa pinakabag-ong pasilidad sa Philippine Eagle Conservation Breeding Sanctuary sa Barangay Eden, Toril, ang unom ka mga agila nga giamumahan sa Philippine Eagle Foundation.
Sumala pa sa opisyal nga si Andi Baldonado, adunay kinatibuk-ang 13 ektaryas ang bag-ong pasilidad diin lima ka ektarya lamang ang gigahin alang sa gambalay apan adunay halapad nga kalasangan aron maseguro ang kaluwasan sa mga mananap.
Giseguro sab sa organisasyon nga ginahan-ay nila ang tanan aron matud pa mamahimong conducive ang bag-ong puluy-anan sa mga agila.
Magpabilin gihapon main office ug educational cite ang ilang gambalay sa Barangay Malagos, ug mamahimo gihapong matataw sa mga bisita ang ubang mga agila.
Dugang pa ni Baldonado, taas ang panahon nga igahin aron ipangbalhin ang tibuok breeding stock tungod nagadepende kini sa pondo nga ilang nakolekta ug ang kahaum sa dalan kon access road alang sa transportasyon sa pagbalhin sa bag-ong pasilidad.
Mipasidaan sab ang PEC alang sa kaluwasan sa mga agila nga mahilayo sa nagpahinabong hulga sa bird flu human natala ang outbreak sa Magsaysay, Davao del Sur niadtong Marso sa nakalabayng tuig.
Gumikan sa pagkasensitibo sa agila sa palibot, posibleng mapapha ang tibuok populasyon sa agila kon ugaling mataptan kini sa maong sakit.
Giamumahan sa kasamtangan ang 32 ka mga agila sa Philippine Eagle Center.
via || Bombo LJF
