DAVAO CITY – Gikanayon ni Mayor Sara Duterte nga nagmugna siya og inspection team diin iya kining gitahasan nga mosubay kung mitamud ang mga establisyemento sa ECQ rules.
Kahinumduman nga gipasirad-an sa lokal nga panggamhanan ang kapin 50 ka mga “non-essential” business establishments nga padayong nag-operate bisan nga anaa sa enhanced community quarantine (ECQ) period ang siyudad.
Gibaharan ang mga nahisgutan nga mamahimong ibutang sa blacklist sa higayon nga supakon ang gipatuman nga closure order.
Una ng girekomenda sa team nga gilangkuban sa department heads sa Business Bureau, City Legal Office, City Health Office, Davao City Investment and Promotion Center, Museo Dabawenyo ug Integrated Gender and Development Division ngadto kang Mayor Inday ang pag-isyu ug cease and desist order batok sa mga non-essential establishments nga padayong nag-operate bisan nga anaa sa ECQ period.
Sumala pa kang Lorna Mandin, inspection team leader, pipila sa mga gambalay nga gipasirad-an ang gilangkuban sa lumber shops, hardware, laundry shops, cellphone accessory stores, gun stores, flower shops, beauty salons, stores nga namaligya ug garments ug sapatos ug dine-in eateries sa Mintal, Tugbok, Calinan, Buhangin, Cabantian, Sandawa, Matina, Toril, Dumoy, Catalunan Pequeno, Bankerohan, A. Pichon St. ug sa Matina Aplaya.
