DAVAO CITY – Gikumpirma ni Davao City Mayor Inday Sara Duterte-Carpio nga dili gilayon mapatuman ang Samal Island-Davao City Connector (SIDC) Project o mas nailhang Davao-Samal Bridge bisan pa man nga gi-aprubahan na kini ug pundohan sa National Government.
Sumala sa Mayor nga usa ka wala niya hinganli nga pamilya diin mahilakip sumala pa ang propedad niini sa itukod nga tulay ang miduso og written opposition sa Department of Public Works and Highways (DPWH) nga maoy project implementor.
Plano sumala pa sa maong pamilya nga moduso og “Writ of Kalikasan” sa korte.
Kahinumduman nga kaniadtong milabay nga bulan sa Nobyembre, gitugtan sa National Economic and Development Authority (NEDA)-Investment Coordination Committee (ICC) ang pipila ka mga proyekto sa nasud diin kalakip niini ang Davao-Samal Bridge ug High Priority Bus System (HPBS).
Una ng gitugtan sa NEDA-ICC ang P23.04 billion pinaagi sa Official Development Assistance (ODA) diin tumong niini nga muhatag og permanente nga road linkage tali sa dakbayan sa Davao ug Island Garden City of Samal (IGACOS) nga dakong tabang aron nga makunhuran ang oras sa biyahe nga sagad masinatian sa higayon nga mosakay pa og ferry.
