DAVAO CITY – Nanawagan si Davao City Mayor Sara Duterte-Carpio sa mga barangay kapitan nga hulaton una ang official government guidelines aron mahiusa ang pagpatuman sa quarantine pass.
Kini human gi-suspende ni Mayor Inday Sara ang pagpanghatag og quarantine pass sa mga barangay leaders human nakamugna og grabe nga kaguliyang ug kalibog sa tanang mga residente.
Kahinumduman nga gisugdan sa mga barangay kapitan ang paghatag ug quarantine passes sa ilang tagsa-tagsa ka mga barangay isip pamaagi aron ma-kontrola ang pagpanggawas ug pagtapok sa daghang mga tao.
Sumala sa Mayor, maayo ang quarantine pass sa pagkontrol sa mga tawo sulod sa matag barangay, apan mipatuman ang mga barangay og lahi nga guidelines ug lahi nga matang sa passes nga miresulta sa kalibog sa katawhan.
Tungod niini, nakahukom ang mayor nga i-suspende una ang quarantine passes hangtud ang lokal nga kagamhanan mopagawas og usa ka opisyal nga kamanduan aron mahiusa ang guidelines alang sa implementasyon sa quarantine passes.
Sumala sa mayor, dili mopatuman ang syudad og quarantine passes hangtud ang syudad mopatuman og enhanced community quarantine.
Dugang sa mayor nga sa kasamtangan, ang dakbayan sa Dabaw ug ang Davao region ang nagpabilin pa gihapong gipa-ilalom sa community quarantine.
