DAVAO CITY – Gibutyag sa Davao City Police Office (DCPO) nga nagapahigayon sila karon og video conference ngadto sa ilang mga sakop aron nga mapasabot pag-ayo ang mga sumbanan ug polisiya sa ginapatuman nga health protocols ilabi na sa mga molatas sa checkpoint.
Tipik lamang kini human nga gimandoan ni Mayor Inday Sara Duterte-Carpio ang mga kapulisan nga i-review ang guidelines sa gipatuman nga community quarantine ingon man pipila ka mga executive orders nga gipatuman sa siyudad may kalabutan sa pakigbatok sa COVID-19 aron nga dili sumala pa maglibog ang mga tawo panahon sa ipahigayon nga inspeksiyon.
Una ng nakadawat og daghanang reklamo gikan sa mga netizen ang dili tin-aw nga pagpatuman sa health protocols sa siyudad ilabi na ang pagpangita og Food and Medicine (FM) pass sa mga checkpoints bisan nga walay kalabutan sa pagpalit og tambal o pagkaon ang paglatas sa mga motorista.
Hinuon gibutyag ni Pol. Capt. Rose Aguilar, tigpamaba sa DCPO, nga nakiglambigit na sila karon sa uban nila nga mga personahe ilabi na nga pipila sa mga nahisgutan ang gi-augment lamang dinhi sa siyudad.
