DAVAO CITY – Gikanayon ni Davao City Mayor ug presumptive Vice President Sara Duterte-Carpio nga wala na sila nagkahinabi sa iyang amahan nga si outgoing President Rodrigo Duterte sukad Agosto sa milabay nga tuig.
Kini bisan pa man nga susama sila nga anaa sa miting de avance sa Hugpong sa Tawong Lungsod -Hugpong ng Pagbabago (HNP) nga gipangunahan ni mayor-elect Sebastian Duterte sa milabay nga Mayo 6 sa San Pedro Street ning dakbayan.
Gitataw sab niini nga siya ug ang iyang amahan wala nagkita sa nahisgutan nga event inay nagkahimamat lamang sila sa longtime aide sa iyang amahan nga si Senator Christopher “Bong” Go.
Hinuon naglaum siya nga magkahinabi sila sa iyang amahan ilabi na nga pipila ka adlaw na lamang mukanaug na kini sa iyang posisyon ug muretiro na sab sa politika.
Kahinumduman nga atol sa ulahing miting de avance, wala na nagdugay si Mayor Inday diin human ang iyang pagpamulong, gilayon kini nga mihawa ayha pa man miabot ang iyang amahan.
Gitataw sab ni Mayor Inday nga wala nila nahisgutan sa iyang amahan ang bisan unsa man nga adunay kalabutan sa politika.
Kahinumduman nga nadismaya si Pangulong Duterte human nga mikandidato ang Mayor isip running mate ni kanhi Senator ug karun presumptive President Ferdinand “Bongbong” Marcos, Jr.
