DAVAO CITY – Mohatag lamang ug detalye sa iyang bahandi si Davao City Mayor Inday Sara Duterte-Carpio sa tukma nga forum.
Hugtanon nga gibarugan sa mayor nga wala siya’y oblegasyon sa katawhan nga hatagan ug katin-awan ang gika-ingong pagdako sa iyang propedad.
Nanukad ang isyo sa Philippine Center for Investigative Journalism (PCIJ) nga nagkanayon nga unom ka pilo ang gika-ingong pagdako sa katigayonan ni Mayor Inday Sara sukad niadtong 2007 hangtud sa 2017.
Gitataw sa inahan sa dakbayan nga iya lamang nga i-detalye ang iyang kadato kung dunay mopasaka ug kaso kaniya sa hukmanan.
Sumala sa mayor nga kinahanglan nga angay nga dunay tukma nga dapit ang pagbutyag sa bahandi sa usa ka public official.
Subay sa impormasyon gikan sa PCIJ mikabat na sa P44.83 ka milyon ka pesos ang networth ni Mayor Inday Sara Duterte-Carpio base sa Assets Liabilities and Networth (SALN).
