DAVAO CITY – Hingpit nang gikansela ni Davao City Mayor Sara Duterte Carpio ang tanan nga mga aktibidad alang sa kasaulugan sa Araw ng Dabaw karong tuiga.
Gikatarungan ni Mayor Sara nga tumong niini aron mapugngan ang pagsulod ug pagkaylap sa 2019 Novel Corona Virus dinhi sa dakbayan sa Dabaw.
Sumala pa ni Mayor Inday, nagkataas ang ihap sa mga nahimong biktima sa maong sakit ug hangtud karon pabilin pang walay nadiskubre nga tambal alang niini.
Dugang pa sa mayor nga limitado lamang ang health care facilities sa syudad ug wala kini igong katakos aron dungan nga atimanon ang gatusan o libuan ka mga pasyente sa usaka higayon.
Subay niini, gideklara ni Mayor Inday nga kanselado na ang mosunod nga mga kalihukan alang sa 83rd Araw ng Davao Celebration: Pasiugdang Pagsaulog, Reyna Dabawenya, Ginoong Davao, Sayaw Pinoy, Kalingawan sa Sta. Ana, Hudyaka, Mutya ng Dabaw, Pasidungog, Araw ng Empleyado, Kanta Bidabawenyo, Parada Dabawenyo, ug Datu Bago Awards.
Bugtong ipadayon lamang mao ang Misa Pasalamat nga ipahigayon sa Marso 1, ug ang nahabiling mga kalihukan ipahigayon sa mosunod nga tuig na. Hinuon, gitin-aw sa Mayor nga magpadayon ang mga local Holidays sa syudad nga gitakdsa March 1 ug March 16.
