Gipasundayag ni Davao City Mayor Sebastian Baste Duterte nga nindot gayud sumala pa ang income sa Davao City, bisan pa man nga wala pa nahimong Pangulo sa nasud ang amahan niini nga si kanhi Pangulong Rodrigo Duterte.
Matud pa sa Mayor nga ilaha matud pang ginasiguro nga mauli gayod ang kwarta sa katawhan pinaagig pagmugna og mga infrastracture projects, paghatag og maayung mga public service, ug paghatag usab ug mga financial assistance ngadto sa mga estudyante ug mga anaa sa ubos nga sektor.
Apan, wala sab nalikayan sa mayor nga batikoson ang pipila ka mga politiko nga inay ibalik ang kwarta ngadto sa mga tawo, ginaugom na hinuon kini.
Gibatikos sab sa mayor ang pipila ka mga opisyal sa gobyerno nga nagapahigayon og mga tabang ngadto sa katawhan, apan adunay mga dagkong nawong nila ug aduna pa gyud mga apelyedo nga gipangpilit sa mga produkto nga ilahang ginahatag ngadto sa publiko.
Panghambog sa mayor nga wala na nila ginabuhat nga ibutang ang ilahang apelyedo sa bisan unsang pamaagi, gumikan kabalo matud pa sila nga ang kwarta nga ilahang ginagamit aron sa pagtabang sa mga nanginahanglan, dili maoy kwarta nga gikan sa ilaha, apan ang maong kwarta maoy gikan sa katawhan, busa kinahanglang ra gayud nga ibalik ra usab kana ngadto sa katawhan nga walay tatak sa ilahang apelyedo.
