DAVAO CITY – Gipangunahan mismo ni Davao City Mayor Sebastian “Baste” Duterte ang coordination meeting mahitungod sa nahitabong Diarrhea Outbreak sa Toril kagahapong adlaw sa City Mayor’s Conference Room.
Sa maong meeting, gipresenta sa Epidemiology Bureau sa Department of Health ug sa City Health Office (CHO) ngadto kang Baste ang comprehensive report mahitungod sa Diarrhea Outbreak.
Kahinumduman nga human ang halos duha ka semana sukad gi-deklara ang outbreak, hingpit na nga gi-anunsyo sa City Health Office pinaagi sa ilang labaw nga si Dr. Ashley Lopez nga natapos na ang diarrhea outbreak sa Toril human nga kamaktikdang nagpadayon ang pagkunhod sa ihap sa mga natalang kaso sa diarrhea sa nakalabay nga semana diin anaa na lamang sa onse ka mga pasyente ang kasamtangang naka-admit sa nagkadaiyang balay tambalanan.
Anaa na usab sa 163 ang naka-recover o tugbang kana sa 75% nga kinatibuk-ang naigo sa diarrhea nga anaa sa 217.
Nasuta nga nagpositibo sa foodborne microorganism with vibrio cholera diin nagpasabot kini nga adunay kontaminasyon sa pagkaon tungod dili maayo ang pag-andam niini sa mga food handlers.
Usa matud pa sa rason sa kontaminasyon mao ang dili maayo nga food storage, delay nga pag serve sa pagkaon ingon man unsanitary environment nga miresulta sa kontaminasyon.
Dugang sab ni Lopez nga luwas na nga imnon ang tubig nga gina suplay sa DCWD samtang nagpahimangno sab ang opisyal ngadto sa mga indibidwal nga ang source sa tubig mao ang deep well ug uban pa, nga pabukalan usa kini ayha gamiton ug inomon.
Karong adlawa usab, pormal nang gitugutan ang subling pagpaninda sa mga street food vendors sa Toril District.
Gisalmutan ang maong meeting ni Vice Mayor Jay Quitain Jr, Acting City Administrator Atty. Francis Layog, CHO Head Dr. Ashley Lopez, mga representatives gikan sa DOH Epidemiology Bureau ug mga representatives gikan sa Davao City Water District (DCWD).
