DAVAO CITY- Subling gipadayag ni Mayor Sebastian Z. Duterte ang hugot niining pagbatikos sa Department of Public Works and Highways (DPWH) sa dili sakto nga paggamit sa pondo nga kwarta sa gobyerno.
Kini ang giluwatang pahayag sa Mayor atol sa iyahang pagtambong sa Araw ng Baranggay Ula, Tugbok Dist., ning syudad sa Davao.
Sumala pa sa batan-ong Duterte nga nagsayang-sayang lamang sa kwarta sa katawhan ang nasampit nga ahensya sa walay pulos nga road construction sa syudad.
Sa iyahang pagpamulong ubay-ubay ang iyahang mga gihimong pananglitan, ug usa na niini ang Barangay Mintal nga ang mga kadalanan sumala pa bisan ug maayo pa ang kondisyon niini, pangbungkagon ug sementuhon ug balik.
Samtang adunay ubang mga kadalanan ang tinuod nga nadanyos, ilabi na sa mga lagyo ug hilit nga lugar ang wala pang-unaha ug gipasagdan lamang ilabi na sa Marilog, ug Paquibato districts nga nagkinahanglan og hinanaling aksyon.
Dugang pa sa Mayor nga inay nga unahon kini nga mga lugar, apan giuna pa hinuon sa DPWH ang mga proyekto nga nakahatod pa hinuon ug kahasol sa katawhan.
Gidugang pa ni Baste nga napakyas ang ahensya sa paghatag ug pagtagad sa tinuod nga gikinahanglan diha sa komunidad.
