Gipasalig ni Davao City Mayor Baste Duterte nga magpadayon gihapon ang iyang suporta sa mga kapulisan nunot paman sa nahitabong pag-ilis og direktor sa DCPO sa ikatulong higayon kaniadtong Hulyo 10, 2024.
Kahinumduman nga kaniadtong nakalabyng adlaw, human sa paglingkod ni PCol. Lito Patay isip direktor sa DCPO sulod lamang sa upat sa oras, giilisan kini ni PCol. Sherwin Butil isip officer in charge, apan dayon nasab kining giilisan ni PCol. Hansel Marantan isip Acting City Director sulod lamang sa pipila ka oras.
Sumala pa ni Mayor Baste, mas labing importante kaniya ang kahimtang sa katawhan ug syudad rason nga gihangyo niini ang kinsa mang molingkod isip mga opsiyal sa kapulisan sa paghatag og tunhay ug tinuoray nga serbisyo.
Dugang usab sa mayor nga ang mabuhat lamang niini karong panahona mao ang pagpaminaw sa mulo ug suhesyon sa katawhan apan nagadepende na lamang kini kung sundon siya sa mga opisyal.
Wala diritsahang gitubag sa mayor ang posibleng “politically motivated” nga mga lakang sa PNP, apan giawhag hinoon niini ang publiko sa pagsusi ug lantaw sa political climate karong panahona.
Samtang sa pangutana kung desidido na ba kining modagan isip senador sa umalabot nga eleksyon, gikanayon lamang niini nga nagadepende kini sa ihatag sa labawng makagagahom.
Kahinumduman nga una nang gikabutyag ni Vice President Sara Duterte ang pagdagan sa mga Duterte sa umalabot nga eleksyon apan ning kasamtangan, nagpabilin gihapon kining walay katin-awan.
