DAVAO CITY- Hugtanong gikondena ni Davao City Mayor Sebastian Duterte ang desisyon sa pagtangtang sa trentay singko ka mga personahe sa Davao City Police Office, lakip ang unom ka mga station commanders, ug city director Col. Richard Bad-ang sa ilang mga katungdanan.
Ang maong lakang, may kalambigitan kuno sa imbestigasyon sa buy-bust operation nga nagpakita nga dunay pag-abuso sa gahum nga gikan sa mas taas nga mga awtoridad.
Sumala sa mayor, makanunayong nagpakita ang Davao City Police Office og pagka-epektibo niini aron mopatigbabaw ang kalinaw ug kahapsay sa dakbayan. Nakatala sab ang dakbayan og mahinungdanong 69% nga pagkunhod sa krimen kung itandi niadtong Mayo 2023 ug karong Mayo 2024.
Matud pa sa mayor, nagpakita kini nga kalampusan sa dedikasyon ug katakus sa DCPO. Nahiubos ang mayor sa pagsaksi sa mga lakang nga makabalda sa trabaho sulod sa ahensiya nga tigpatuman sa balaod.
Ang mga opisyal nga gilambigit, lakip na si city director Col. Bad-ang, ug mga station commanders, nagpakita sa ilang di-matarog nga kaakuhan sa ilang mga responsibilidad.
Dugang pa, ubay-ubay nga ebidensya ang nakalap ug nagasuporta nga gipatigayon subay sa balaod ang maong buy-bust operation.
Gikondsidera sab sa mayor nga walay basehan ug dili makatarunganon ang pagpakatag nga dunay sayop sa ilang gibuhat.
Gipahinumdum sa mayor ang nakalatid sa Republic Act 6975 kon Department of the Interior and Local Government Act of 1990 nga kinahanglang magpahigayon ang mga mayor sa dakbayan ug munisipyo og operational supervision ug kontrol sa mga yunit sa PNP sa ilang tagsa-tagsa ka hurisdiksyon.
Nagpakita ang aktibong pagsalmot sa dedikasyon sa pakigtambayayong sa kapulisan aron mapreserba ang kalinaw ug kahapsay sa Davao City.
Dugang niana, gihimo kining ulahing mga lakang nga batok sa gitangtang nga mga personahe sukwahi kini sa diwa sa kooperasyon ug pagsalig sa usag usa nga mahinungdanon alang sa epektibong pagdumala ug pagpatuman sa balaod.
Hugtanong nisupak ang mayor sa bisan unsang lakang nga makahuyang sa dugay na nga napanday nga pagsalig tali sa katawhan sa Davao ug sa kapulisan ug magsilbing pahinumdom sa kadelikado sa absolute authority.
Nanawagan si Mayor Baste alang sa hinanaling pagpabalik sa mga opisyales nga di makatarunganong gitangtang sa ilang pwesto.
